"Bismillahir-Rəhmanir-Rəhim” müstəqil ayədirmi?

Məsum imamlar israr etmişlər ki, namazda "bismillah” ucadan deyilsin

Başqa fiqh rəhbərlərindən yüz il qabaq fəaliyyətə başlamış, Allah yolunda şəhadətə çatmış, Quranda paklığı yad edilmiş peyğəmbər Əhli-beytinin (ə) etiqadına görə, "bismillahir-rəhmanir-rəhim” ayəsi Qurana daxil olan müstəqil bir ayədir. Fəxr Razi öz təfsirində "bismillah”ın surə tərkibi olmasına on altı dəlil gətirir. Alusi də belə bir etiqaddadır. Əhmədin "Müsnəd”ində də "bismillah” surə tərkibi sayılmışdır. ("Müsnəd”, c. 3, s. 177; c. 4, s. 85.) "Bismillah”ı surədən saymayan və ya onu namazda tərk edənlər etirazla qarşılanmışlar. Hakimin "Mustədrək”ində deyilir: "Bir gün Müaviyə namazda "bismillah” demədi. Xalq ona etiraz edərək dedi: "Ayəni oğurladın, yoxsa yaddan çıxardın?” ("Müstədrək”, c. 3, s. 233.)
Məsum imamlar israr etmişlər ki, namazda "bismillah” ucadan deyilsin. İmam Baqir (ə) namazda "bismillah” deməyənlər haqqında buyurmuşdur: "Quranın ən üstün ayəsini oğurladılar.” ("Bihar”, c. 85, s.20.) Beyhəqinin "Sünən”ində bir hədisdə belə deyilir: "Nə üçün bəziləri "bismillah”ı surədən saymırlar? ("Sünəne-Beyhəqi”, c. 2, s. 50.)
Şəhid Mütəhhəri həmd surəsinin təfsirində İbn Abbası, Asimi, Kəsayini, İbn Öməri, İbn Zübeyri, Ətaini, Tavusu, Fəxr Razini, Süyutini "bismillah”ı surədən sayanlar kimi tanıtdırır.
"Təfsiri-Qurtəbi”də imam Sadiqdən (ə) belə nəql olunur: "Bismillah” surələrin tacıdır.” Yalnız "Bəraət” ("Tövbə”) surəsinin başlanğıcında "bismillah” gəlməmişdir. Həzrət Əlinin (ə) buyruğuna əsasən, bunun səbəbi kafirlərdən və müşriklərdən üz döndərməyi əmr edən "Bəraət” surəsi ilə mərhəmət dolu "bismillah” kəlməsinin uyğun gəlməməsidir. ("Təfsiri-Məcməul-bəyan”; "Təfsiri-Fəxr Razi”.)